中科荣获公益中国爱心救助定点医院 http://www.bdfyy999.com/bdf/zhongkedongtai/zhongkexinwen/102565.html
「本文来源：新民晚报」
文并图/沈一珠迭只菜是从网浪学来嗰，搿搭先讲几句题外话。先是百里香。其实网浪菜场，或者超市里侪有卖嗰。搿天想下单买个辰光，觉着稍微有点贵，就上网查了一查，发现有直接买盆栽百里香嗰，价钿还便宜，就决定直接从网浪买棵苗来种，既可以让阳台里多棵香草，又可以一劳永逸，想用个辰光就摘点下来，就像从前，家家人家阳台里，侪用破面盆、破钵头种点葱，随用随摘，一举二得，美滋滋。结果啥人晓得，买来后看上去绿油油鲜嫩嫩个几棵百里香，不晓得是水土不服，还是勿会照顾，呒没几天，就辣风中零乱成了灰扑扑个干草。搿能一看，两全其美个事体，不是介便当嗰。再是胡萝卜。第一趟看到迭种紫胡萝卜个辰光，先是想到转基因。后来再晓得，世界浪第一根胡萝卜就是黑紫色嗰。一直到16世纪末，胡萝卜个颜色还是紫嗰。后来，荷兰人对胡萝卜出手了，通过变异栽培进行改良，胡萝卜慢慢交变成了现在阿拉看到个样子。所以，追根寻源，迭种紫颜色个胡萝卜才是正宗。味道呒没，迭种紫颜色胡萝卜更加接近阿拉小辰光吃个本地胡萝卜，深桔红嗰，吃口更加甜一眼、脆一眼。天气慢慢交风凉了，又是高温又是台风个热天就要结束了，试试看，烤盆胡萝卜，百里飘香。材料：迷你紫胡萝卜8、9根，再准备点百里香、橄榄油、盐。做法：先拿迷你紫胡萝卜汏干净，沥干水分备用；再拿一只大碗，拿迷你紫胡萝卜放进去，撒点盐和百里香，再加点橄榄油，拌匀，腌制15分钟。烤箱摄氏度预热，烤盆里垫张锡纸头，拿腌好个胡萝卜平铺，上下火度，烤25分钟左右。开烤箱看看，胡萝卜软熟了，就可以端出来吃了。
